Neuleuman Kitab Al Hikam: Ngaropea Hate, Nungtun kana Jalan Ahlakul Mahmudah 

Kitab Al Hikam minangka kitab tasawuf nu kawilang populer pikeun umat Islam di Indonesia. Ieu kitab jadi salasahiji kitab nu diajarkeun di meh unggal pasantren di sakuliah daerah. 

Runtuyan eusining Kitab Al Hikam mindeng diguar ku paraulama dina pirang-pirang kagiatan pangajian, boh di kota boh di padesaan.

Kitab Al Hikam nu leubeut ku pepeling jeung nasehat teh disusun ku Abu Fadil bin Muhammad bin Abdul Karim bin Abdurrahman bin Abdulloh bin Isa bin Husen bin Atha'illah as-Sakandary (1250 M-1309 M).

Ngeunaan rupaning hikmah eta kitab, sesepuh Majelis Taklim Baitun Nidzom Cihanjuang, KH Syihabuddin Mahmud, mertelakeun, hikam teh bentuk jama tina kecap hikmah. Luyu jeung lafadzna ngaran kitab, eusining Kitab Al Hikam euyeub ku rupaning hikmah.

"Minangka nasehat jeung motivasi, Kitab Hikam ngaguar perkara ajen-inajen tauhid katut ahlak nu oge notog kana elmu tasawuf," pokna, Kemis (7/11/2024).

Ku ngaderes Kitab Al Hikam, dipiharep mingkin ngagederna ihtiar urang geusan ngaropea hate. Laju mucunghulkeun patekadan diri pikeun ngalarapkeun laku lampah kahadean enggoning ngahontal darajat ahlakul mahmudah di satengahing kahirupan di ieu alam dunya.

"Ka beh dituna, atuh ku ngaji Kitab Hikam teh masing tepi kana tuwuhna kasucian jiwa dina diri urang," ceuk KH Syihabuddin Mahmud, nu oge Pengurus Ranting Nahdlatul Ulama (PRNU) Desa Cihanjuang, Kabupaten Bandung Barat.

Satuluyna inyana ngebrehkeun, neuleuman Kitab Hikam teh mawa mangpaat malar kahirupan urang mingkin jongjon, tumanimah tur tingtrim, boh dina bab pakasaban boh dina perkara ibadah nu dohir sumawona nu batin.

"Hikmah motivasi sejenna nyaeta urang teu babari galider ku gogoda katut hahalang, tapi tetep pengkuh kana aqidah kalawan nyonto ahlakna Kanjeng Nabi," pokna.

Rupa-rupa perkara nasehat nu diguar dina Kitab Hikam antarana wae ngeunaan ngaragap hate. Hate ulah ieuh sina katutup pikeun ngajalankeun kataatan urang ka Nu Kawasa. Kitu deui sikep manusa lagu dipaparin nikmat kabungah atawa keur nampa ujian kasedih.

Nampa nikmat kabungah urang kudu sukuran jeung dzikir, atuh mun keur nandangan cocoba disanghareupanana teh ku sabar kalawan muntang kana pitulung Allah Swt.

Nyutat katerangan Ibnu Atha'illah, KH Syihabuddin Mahmud ngeceskeun, nalika Allah rido maparinan, eta teh saenyana Gusti keur nembongkeun kanyaah-Na ka urang. Sedengkeun mangsa keur nolak maparinan, saenyana Allah keur nembongkeun kakawasaana-Na.

"Kitu kieuna, enas-enasna mah Allah teh teu weleh nembongkeun kanyaah rohmat-Na ka manusa minangka mahluk-Na," pokna deui.

Anapon hubungan eusi Kitab Al Hikam jeung tarekah ngandelan aqidah katauhidan, pok KH Syihabuddin Mahmud, "Kantenan dalit pisan, ngaji Hikam bisa jadi jalan geusan ngaronjatkeun kayakinan jeung kaimanan tug wushul ka Allah Swt."