Marasan: Tradisi Meresihan Orok Luyu jeung Sunah Nabi

Nampa ondangan sukuran gumelarna anakna Ki Sobat. Anakna nu katilu, awewe. Acarana teh lumangsung sabada Magrib, di Madrosah Baitun Nidzom, Kampung Karangsari, Desa Cihanjuang, Kabupaten Bandung Barat, sababaraha waktu kaliwat.

Prung dimimitian tabuh satengah tjuh. Nu haladir aya kana lima puluh urangna, teu kolot teu budak. Biantara sohibul makosid, laju kana tawasulan, tahlilan, marhabaan, jeung ngadu’a, nu dipingpin ku KH Syihabuddin Mahmud, sesepuh majelis taklim.

Reres tawasulan katut tahlilan, oge maca barjanji nu dinadomkeun, tuluy marhabaan nu dipirig ku grup barudak hadroh. Orok dipangku ku emangna, nguriling ka parajamaah nu haladir, nu ngaradeg. Dituturkeun ku nu mawa baki eusi samping, pakean orok, gunting, pisin; nu mawa dawegan nu ditanceban bandera duit; tur nu mawa cai kembang.

Meunang sababaraha kuriling, buuk orok teh diparas. Nu marasna ti entragan kokolot, sapuluh urang. Sora nu marhabaan beuki tarik. 
Ka nu geus marasan eta orok, sup saku bajuna diasupan duit, sapuluh rebu. Enya, duit tina bandera duit nu ditanceb dina dawegan tea.
Tah, lagu eta orok diparas teh, aya saweran. Bebenyit ciweuh tapi galumbira, marebutkeun saweran duit kencring, oge duit lambaran. 
Geus beres orok diparas mah, tuluy ngadu’a. Sohibul makosid ngahaturkeun nuhun. 

Ceuk KH Syihabuddin Mahmud, ilaharna marasan teh digelar bareng jeung ekahan, sarta bari mere ngaran eta orok. Anapon nu jadi dalil marasan teh sakumaha dawuh Rasulullah, "Sakur budak eta digadekeun kana 'aqeqahna, anu dipeuncit dina poe katujuhna tina lahiran eta budak, tur diparas buukna, oge dingaranan."

"Ari nu pangafdolna mah marasan teh digelar poe katujuhna ti kawit orok lahir. Atawa dina poe ka-14, 21, 28, tur poe ka-35-40," pokna.
Sedengkeun hikmah tina marasan antarana wae keur kolotna mah alhamdulilah hasil bisa ngalaksanakeun sunah Nabi. Atuh pikeun orokna nyaeta meresihan tina kokotor nu kabawa dina waktu lahiran, di antarana buukna.

"Muga wae ku digelarna acara marasan nu dibarung ku deudeul runtuyan du'a teh, eta orok sing jadi insan nu soleh-solehah kalawan mibanda hate nu beresih," ceuk KH Syihabuddin Mahmud, nu oge Pengurus Ranting Nahdlatul Ulama (PRNU) Desa Cihanjuang.