Ngalenyepan Hikmah Malem Lailatul Qodar, Bukti Kanyaah Allah ka Umat Rasulullah

Allah Swt merenahkeun lailatul qodar dina bagean ahir bulan Ramadhan, sangkan poe-poe samemehna jadi poean tatahar pikeun mapag kahadean, rohmat, jeung karunia-Na. Nalika datang lailatul qodar, ruhiyah urang sing enya-enya aya dina kaayaan deukeut jeung Allah kalawan dieuyeuban ku ngalakonan pirang-pirang ibadah dibarung kaihlasan, sumanget, katut hate nu beresih.

Ihtiar kasiapan jiwa enggoning mapag sarta sangkan urang ditepungkeun jeung lailatul qodar, antarana ku ngadu’a, “Ya Allah, masing tepikeun ieu hamba tepung sareng lailatul qodar sarta masing asup kana golongan jalma-jalma nu meunangkeun lailatul qodar".

Ku eta du’a, urang sadaya miharep pitulung Allah malar meunangkeun lailatul qodar kalawan mampuh ngeuyeubanana ku amalan nu panghade-hadena.

Lian ti eta, ngagungkeun lailatul qodar na jero hate, sakumaha firman Allah dina QS Al-Hajj ayat 32, “Tetela (parentah Allah). Jeung sing saha nu ngagungkeun syi'ar-syi'ar Allah, saestuna eta teh mucunghul tina katakwaan hate”.

Maleman lailatul qodar tetela teu saperti malem-malem sejenna. Malem lailatul qodar minangka peuting nu kalintang istimewana mungguh Allah, jadi malem nu panghadena di antara sakabeh peuting ciptaan Allah sapanjang jaman.
Meh sakabeh malaekat hadir dina malem lailatul qodar tug tepi ka teu aya tempat di Bumi nu kosong, iwal dieusian ku eta paramalaekat.

Ku kituna, urang sadayana kudu ngagungkeun eta malem, alatan kaasup syi’ar Allah. Tah, samemeh ngagungkeunana ku tilawah al-Quran, taubat, istighfar, dzikir, du’a, shalat jeung munajat, urang ngagungkeunana heula na jero hate kalawan iman kana rupaning kautamaan lailatul qodar tur miharep kabarokahanana.

Sesepuh Majlis Taklim Baitun Nidzom Cihanjuang, KH Syihabuddin Mahmud, mertelakeun, ngamulyakeun lailatul qodar na jero hate teh antarana ku cara maca surah al-Qodar dina sakur rokaat shalat wajib atawa sunah. Pangna kitu, malar aweuhan ma’nana bisa ngalimpud dina diri.

“Ku kituna dipiharep, sabot hate urang ngagungkeun lailatul qodar teh nguniang motivasi nu kuat geusan meunangkeun kabarokahanana,” pokna.

Ku eta tarekah nu dibarung ku du’a, mugi wae Allah Swt maparin pahala tur urang bisa kaasup golongan nu meunangkeun pahala lailatul qodar sarta kabarokahanana, sok sanajan mungkin wae Allah nakdirkeun urang maot samemeh datangna lailatul qodar.

“Lailatul qodar tetela malem nu mulya nu hususon pamaparin Allah ka umat Rasulullah, nu kautamaanana ngaleuwihan sarebu bulan,” ceuk KH Syihabudin Mahmud, nu oge rengrengan Pengurus Ranting Nahdlatul Ulama (PRNU) Desa Cihanjuang, Parongpong, Kabupaten Bandung Barat.

Anapon waktuna kajadian lailatul qodar eta teh mungguh rusiah Allah. Hikmah pangna kitu teh sangkan tetep ngagedur sumanget dina diri urang pikeun ngahontal barokah lailatul qodar ku cara ngaronjatkeun amalan ibadah dina sakur poe bulan Ramadhan, utamana waktu maleman ganjil poean sapuluh ahir Ramadhan.

“Najan eta ge aya sababaraha prediksi ti paraulama ngeunaan waktuna kajadian lailatul qodar, nu pamianganana kairong ti mimiti meneran awal bulan suci Ramadhan,” pok KH Syihabuddin Mahmud.

Nalika lailatul qodar, malaekat jeung eroh-eroh suci turun ka Bumi kalawan jadi kabarokahan nu luar biasa pikeun umat Islam. Syekh Jalaluddin Assuyiti kungsi ditalek, naha Malaekat Jibril ge lungsur deui ka Bumi? Sedengkeun tugasna nepikeun wahyu ka paranabi teh geus rengse, da taya deui nabi sanggeusna Nabi Muhammad Saw.

Syekh Jalaluddin ngawaler, Jibril baris lungsur ka Bumi dina dua kasempetan, nyaeta nalika lailatul qodar jeung waktu aya urang Islam nu tilar dunya nu teu weleh aya dina kaayaan suci atawa dawam wudu.

Ceuk KH Syihabuddin Mahmud, sakumna jalma boga hak meunangkeun kautamaan lailatul qodar, tapi ukur jalma-jalma pilihan Allah nu meunangkeunana. Najan kitu, urang sakabehna teu weleh dipaparin kasempetan ngalap barokah lailatul qodar ku jalan ngalakukeun rupaning amal ibadah nu ajen pahalana baris ditikelkeun sarebu bulan.

“Bacaan tasbih, tahmid, dzikir jeung nu sejenna, pahalana baris ditikelkeun manglipet-lipet batan waktu-waktu sejenna. Lailatul qodar minangka salasahiji bukti kanyaah Allah ka umat Rasulullah Saw, jadi bekel dina lalampahan kahirupan jaga keur pibekeleun di alam aherat,” pokna.