Kunaon Asup NU?
Ku: Fajri M Ibrahim Oeron (Kaka Fajri)
Abdi nuju ateul tanduk
Ka NU hayang nyuruduk
Malah boga sangka buruk
Nyebut bid'ah tos muruluk
Sabab kapungkur mah kuring
Nganggap tasawuf teu penting
Bermadzhab ge henteu kenging
Aduh gening henteu eling
Tuluy kuring muka kitab
Maca ngan dua paragrap
Nerangkeun pentingna madzhab
Ku hate langsung katangkap
Tuluy kuring muka deui
Kitab nu kadua kali
Nerangkeun madzhab Asy'ari
Ti dinya kuring kataji
Satuluyna kuring ngaji
Namatkeun jam'ul jawami
Ka ajengan anu ngarti
Namina Mama Qolyubi
Harita mama marentah
Ka abdi bari someah
Supaya muka dirosah
Nu dingaranan al-Qudwah
Satuluyna abdi ingin
Ngaji sadatul muttaqin
Syarah ihya ulumudin
Hate abdi beuki yakin
Beuki yakin tauhidna
Kudu madzhab Asy'arina
Beuki yakin tasawufna
Nuturkeun al-Ghozalina
Atuh mun dina fiqihna
Cokot salah sahijina
Tina madzhab nu opatna
Ulah ragu nuturkeuna
Ku nuturkeun ulamana
Ku pedah hayang ngartina
Kana Qur'an jeung Hadisna
Katut tafsir jeung syarahna
Tuluy kuring mikir deui
Ku pikiran anu murni
Nu datangna tina ati
Kudu ka mana ngahiji
Sabab kuring masih keneh
Ngabogaan sangka aneh
Ka NU anu saroleh
Ngan ku kuring teu kadeleh
Ari sangkaan anehna
Ka Nahdatul Ulamana
Pedah Islam Nusantara
Kuring can apal eusina
Malah kuring kungsi mitnah
Nyangka geus sasar dolalah
Ka NU nu geus katelah
Nyekel madzhab ahlus sunnah
Ngan hate mah teu merean
Nyebut dolalah ka ikhwan
Ku kituna kuring sowan
Rek tabayun ka ajengan
Ari eusi tabayunna
Bab Islam Nusantarana
Cik kumaha sabenerna
Jero Islam Nusantara
Hasil tabayun tugenah
Geuning teu aya nu salah
Islam Nusantara ramah
Ngarah umat tumaninah
Pangna diayakeunana
Ngaran Islam Nusantara
Lain arek ngarobahna
Kana ajaran islamna
Tapi Islam Nusantara
Islam di Indonesia
Make ajaran Islamna
Nu teu ngarombak adatna
Tegesna nyaeta adat
Nu teu ngaruksak syareat
Model kitab nu dilogat
Dibatik jeung anu hajat
Adat anu bertentangan
Jeung syareat dijauhan
Model nyembah papatungan
Tapekong jeung anu lian
Satuluyna ditaliti
Amaliyah hiji hiji
Ternyata NU teh bukti
Jalmana garetol ngaji
Dijerona euweuh bid'ah
Komo syirik jeung dolalah
Tapi NU ahli sunnah
Amaliyahna ge nyunah
Ku kituna kuring hijrah
Ba'da shalat istikharah
Hayang di Ansor merenah
Sabab yakin NU nyunah
Waktos tanggal tujuh likur
Sasih Oktober katutur
Ngiring PKD di Ansor
Jeung para santri senior
Sabada abdi di NU
Abdi teu ngarasa ragu
Parentahna digugu
Sabab yakin tina elmu
Atuh ulah ngajejeleh
Ka abdi nyangka nyeleneh
Sabab jadi NU soteh
Meunang mikir jeung nu soleh
Moal mungkin kuring pindah
Lamun NU henteu nyunah
Puguh NU anti bid'ah
Madzhabna ge ahlus sunnah
Lamun anjeun masih ragu
Ka NU embung ngagugu
Sok anjeun neangan elmu
Ngarah hate henteu semu
Pangeran NU teh Allah
Nabina ge Rosulullah
Qiblatna sarua Ka'bah
Munggah hajina ka Mekah
Nyekel kana Qur'an Sunnah
Ijma qiyas jadi hujah
Aqidahna ahlus sunnah
Lebah mana anu salah?
Jalma anu nganggap bid'ah
Ka NU eta teh ghibah
Lamun ngomong sing merenah
Jaga manah jaga letah
Ormas NU lain syi'ah
Komo liberal mah fitnah
Tapi NU ahlus sunnah
Anti syirik anti bid'ah
Atuh mun aya awonna
Ulah nyalahkeun ormasna
Da ormas mah teu salahna
Tapi jalma nu lacutna
Ulah nyalahkeun ulama
Eta teh maksiat dosa
Ulama NU baragja
Elmu luhung amal loba
Dakwah NU menyejukan
Kana hate mendinginkan
Nyaman kalau didengarkan
Mendakwahkan isi Qur'an
Sakieu nu kasanggakeun
Ieu nadhom pek regepkeun
Ngarah bisa ngaleungitkeun
Sangka goreng kalieskeun
Ieu nadhom diseratna
Di pasantren al-Qudwahna
Nu aya di Jalan Benda
Pasantren salaf murnina
Nadhom ieu teh diserat
Ku kaka Fajri teu lepat
Supaya jadi mangpaat
Ka diri sareng ka umat
Abdi nyuhunkeun du'ana
Kasadayana nu maca
Muga abdi sing sehatna
Maot husnul khotimahna
Sareng mugi guru abdi
Kersana Mama Qolyubi
Dipaparinan ku Gusti
Kanikmatan nu abadi
Oge mugi nini abdi
Ma Haji Yayah nu ngarti
Sareng ibu rama abdi
Lebet ka surgana gusti.
Aamiin Ya Robbal Alamin
Muga dosa dihapusan
Kaaeban ditutupan
Ku Gusti nu Maha Rohman
Husnul khotimah pasihkeun.
Penulis pengasuh Pondok Pesantren Al-Qudwah, Tasikmalaya