Kaistimewaan Kitab Jurrumiyah, KH Miftachul Akhyar: Ngarangkum Saripati Elmu Nahwu

Kitab Ta'liqotul Muqaddimat Al-Jurrumiyah fi Nahwi atawa ilahar disebut Kitab Jurrumiyah, eta teh minangka kitab karya Ibnu Ajurrum, nu ngaran lengkepna Abu Abdullah Muhammad bin Muhammad bin Ajurrum as-Shanhaji. 

Ibnu Ajurrum gumelar di Kota Fez, Maroko, taun 672 H/1273 M tur wafat taun 723 H/1323 M. Ceuk Rais 'Aam Pengurus Besar Nahdlatul Ulama (PBNU), KH Miftachul Akhyar, Kitab Jurrumiyah kalintang istimewana.

Sabada pupusna ahli nahwu, Imam Ibnu Malik, nu nyusun Kitab Alfiyah, tuluy aya ahli nahwu sejenna, nyaeta Imam Shanhaji nu nyusun Kitab Al-Jurrumiyah. Barokah tina eta kitab, ngaran Ibnu Ajurrum kawentar ka sakuliah dunya, tur kitabna jadi kajian utama nu dideres di sakumna pasantren.

"Istimewana Kitab Jurrumiyah sabab eusina babari diapalkeun, kalawan eusina nu patali jeung kaidah-kaidah fiqhiyah, katut tarkib-tarkibna ge kawilang babari," pokna.

Laju Kiai Miftachul ngebrehkeun, sabot Ibnu Ajurrum nyusun Kitab Jurrumiyah di hareupeun Ka'bah, tetela keretas nu dipake nulis teh bet kabawa angin. Tuluy anjeunna ngadu'a, "Kuring nulis ieu kitab teh ihlas, lain pedah ku sabab manusa, lain pedah guru, oge lain pedah alatan babaturan, mungguh ihlas. Ya Allah, mun enya ieu tulisan didasaran ihlas, naha bet hiber kabawa angin? Ihlas, mugi Anjeun mulangkeun deui eta keretas ka kuring."

"Reres ngadu'a, eta keretas nu kabawa angin teh balik deui ka Ibnu Ajurrum," ceuk Kiai Miftachul.

Sanggeus Kitab Jurrumiyah disusun, ku Ibnu Ajurrum eta kitab teh dipalidkeun ka laut. Tuluy ngadu'a, mun eta kitab disusun kalawan tulus jeung ihlas, ulah ieuh ruksak najan teuleum na sagara nu ombakna ngagalura.

Tetela, sabada sababaraha waktu, eta kitab masih tetep utuh, henteu ruksak.

"Sumebar barokahna Kitab Jurumiyah, teu saeutik alim ulama nu kabarokahan ku ieu kitab antukna jadi paham Alfiyah, ngawasa Kitab Qathrun Nada, oge paham eusining Kitab Mughni Labib," pok KH Miftachul Akhyar.

Satuluyna Ibnu Ajurrum mulang deui ka Kota Fez, ngajar Elmu Nahwu jeung Al-Qur'an. Anjeunna ge minangka ahli Qiraat ti Universitas Al-Hayi, Andalusia, Spanyol.

Najan Kitab Jurrumiyah teh kawilang leutik, tapi eusina kalintang mundelna, ngarangkum saripati dasar-dasar Elmu Nahwu. Mun diteuleuman kalawan daria, Kitab Jurrumiyah geus jadi dasar cecekelan geusan neuleuman kitab-kitab nu saluhureunana.

Ceuk Kiai Miftachul, dina jero taun 600 H-700 H, patingmucunghul ulama-ulama moyan nu ahli Elmu Nahwu. Upamana wae aya Imam Ibnu Hayyan An-Nahwi, guruna Imam Shanhaji, tuluy Imam Ibnu Malik, katut Imam Ibnu Hisyam Al-Anshori. 

"Harita, parasantri jeung mahasiswa pada tarolab Elmu Nahwu. Imam Nawawi ge ngaji nahwu di Imam Ibnu Malik. Padahal anjeunna teh jagona fiqih, tapi ngaji nahwu. Elmu Nahwu harita keur sumedeng nanjeur komarana, sabab Nahwu bisa dipake keur dalil fiqih. Katambah deuih Nahwu ge bisa dijadikeun dasar pikeun ngajarkeun tasawuf," pok KH Miftachul Akhyar. ***

Penulis: Rameli Agam