• logo nu online
Home Nasional Warta Sejarah Khutbah Taushiyah Kuluwung Ubudiyah Daerah Keislaman Syariah Obituari Risalah Doa Tokoh Tauhid Profil Hikmah Opini Wawancara PWNU Ngalogat Ekonomi Lainnya
Selasa, 16 April 2024

Khutbah

KHUTBAH JUMAT

Khutbah Jumat Basa Sunda: Lima Perkara anu Patali jeung Hate

Khutbah Jumat Basa Sunda: Lima Perkara anu Patali jeung Hate
Khutbah Jumat Basa Sunda: Lima Perkara anu Patali jeung Hate
Khutbah Jumat Basa Sunda: Lima Perkara anu Patali jeung Hate

Khutbah I


اَلْحَمْدُ للهِ الَّذِي شَرَحَ صُدُوْرَ الْمُوَفَّقِيْنَ بِأَلْطَافِ بِرِّهِ وَآلَائِهِ، وَنُوْرِ بَصَائِرِهِمْ بِمُشَاهَدَةِ حُكْمِ شَرْعِهِ وَبَدِيْعِ صَنْعِهِ وَمُحْكَمِ آيَاتِهِ، وَأَلْهَمَهُمْ كَلِمَةَ التَّقْوَى، وَكَانُوا أَحَقَّ بِهَا وَأَهْلَهَا، فَسُبْحَانَهُ مَنْ إِلَهٌ عَظِيْمٌ، وَتَبَارَكَ مَنْ رَبٌ وَاسِعٌ كَرِيْمٌ، وَأَشْهَدُ أَن لَا إِلَهَ إِلَّا اللهُ وَحْدَهُ لَا شَرِيْكَ لَهُ، فِي أَسْمَائِهِ، وَصِفَاتِهِ، وَأَفْعَالِهِ، وَخَيْرَاتِهِ، وَأَشْهَدُ أَنَّ مُحَمَّدًا عَبْدُهُ وَرَسُوْلُهُ، أَشْرَفُ رُسُلِهِ وَخَيْرِ بَرِيَاتِهِ، اَللَّهُمَّ صَلِّ وَسَلِّمْ وَبَارِكْ عَلَى مُحَمَّدٍ وَعَلَى آلِهِ وَأَصْحَابِهِ فِي غَدَوَاتِ الدَّهْرِ وَرُوحَاتِهِ


قَالَ اللهُ تَعَالَى فِي الْقُرْآنِ الْكَرِيْمِ وَهُوَ أَصْدَقُ الْقَائِلِيْنَ أَعُوْذُ بِاللهِ مِنَ الشَّيْطَانِ الرَّجِيْمِ ، الَّذِينَ آمَنُوا وَتَطْمَئِنُّ قُلُوبُهُمْ بِذِكْرِ اللَّهِ أَلَا بِذِكْرِ اللَّهِ تَطْمَئِنُّ الْقُلُوبُ ،  وَقَالَ النَّبيُّ صَلَّى اللهِ علَيْهِ وَسَلَّمَ : أَلَا وَإِنَّ فِي الْجَسَدِ مُضْغَةً إِذَا صَلَحَتْ صَلَحَ الْجَسَدُ كُلُّهُ، وَإِذَا فَسَدَتْ فَسَدَ الْجَسَدُ كُلُّهُ، أَلَا وَهِيَ الْقَلْبُ ، صَدَقَ اللهُ الْعَظِيْمُ وَصَدَقَ رَسُوْلُهُ الْحَبِيْبُ الْكَرِيْمُ وَنَحْنُ عَلَى ذَلِكَ مِنَ الشَّاهِدِيْنَ وَالشَّاكِرينَ وَالْحَمْدُ للهِ رَبِّ الْعَالَمِيْنَ، أَمَّا بَعْدُ


Hadirin sidang Jumah anu mulya 
Langkung ti payun hayu urang sami-sami manjatkeun puji sareng syukur ka Alloh Robbul Gofur. Dzat anu teu liren-liren ngalimpahkeun ni’mat ka urang sadayana, kalebet ni’mat taufik sareng hidayah-Na. Sahingga dina waktos anu mulya ieu, urang sadayana tiasa ngalaksanakeun salah sawios parentah-Na, nyaeta solat Jumat berjamaah.


Solawat sareng salam anu sampurna mugi salamina dicurahkeun ka Panutan Alam, nyaeta Kangjeng Nabi Muhammad saw. Sholawat sareng salam oge mugi dicurahkeun ka para sahabatna, para tabi’in, tabi’it tabi’in, dugika urang sadayana salaku umatna. Mudah-mudahan urang sadayana kenging taufiq hidayah kanggo tumut kana ajaran mantenna kalayan di akherat kenging syafaatna. Amin ya robbal alamin.


Sidang Jumah rohimakumulloh 
Sateuacan ngalajengkeun ieu khutbah, sakumaha biasa, khotib seja wasiat khusus ka diri pribadi, umum ka hadirin sadayana, hayu urang sami-sami ningkatkeun kaimanan sareng katakwaan ka Alloh swt. Sabab, takwa teh pang hade-hadena bekel urang, terutami bekel mayunan kahirupan lana akherat tea anu disebat alam panjang poe panjang nagara tanjung sampurna.


Salajengna kedah kauninga ku urang yen kabagjaan dunya jeung akherat teh gumantung kana sehatna hate, sedengkeun sehatna hate gumantung kana rupa-rupa perkara. Di antarana pinuhna hate ku kayakinan sareng kaimanan ka Alloh, euyeubna hate ku rupa-rupa sifat pinunjul, sareng bersihna hate tina rupa-rupa panyawat sareng sifat tercela.


Hayu urang sami-sami titenan salah sawios pidawuh Alloh dina Al-Quran anu mangrupikeun petikan doa Nabi Ibrahim:


وَلا تُخْزِنِي يَوْمَ يُبْعَثُونَ ، يَوْمَ لا يَنْفَعُ مالٌ وَلا بَنُونَ ، إِلاَّ مَنْ أَتَى اللَّهَ بِقَلْبٍ سَلِيمٍ


Hartosna, “(He Pangeran abdi), ulah ngahinakeun ka abdi dina poe maranehna dibangkitkeun. Nyaeta poe nalika teu guna deui harta jeung anak turunan, kecuali jalma anu madep ka Allah kalayan nyandak hate anu salamet (beresih),” QS. as-Syu’ara [26]: 87-89).


Tah ngalangkungan eta ayat tetela pisan yen nu salamet di akherat teh nyaeta jalma anu nyandak hate anu beresih. Sanes kanten janten modal keur ngahontal kabagjaan akherat, hate anu beresih oge janten sarana keur ngahontal caang jeung legana hate anu janten modal keur ngahontal kabagaan dunya anu keur dirandapan.


Ku hal sakitu, hate janten bagian penting dina awak urang. Naha janten bagian anu penting? Margi hate anu nangtukeun hade sareng gorengnya anggahota badan anu sejen, sakaligus anu nangtukeun berharga sareng henteuna amal jalma anu gaduhna. Kalih ti eta, hate jadi anggahota badan anu gampang kapangaruhan, gampang robah, gampang gering, sareng hese diubarannana nalika tos gering.


Dumasar sadaya hal eta, para ulama tasawuf ngagaduhan perhatosan anu luar biasa kana urusan hate. Imam al-Ghazali salah sawiosna. Numutkeun pandangan anjeuna, sing saha anu hayang memeres amalna sareng tingkah polah dohirna, maka pek mimitian ku meresan hate. Nanging, urang moal tiasa memeres hate kalayan bener-bener, samemeh uninga kana lima perkara penting nu patali sareng eta hate.


Kahiji, Allah maha uninga kana sagala hal anu disimpen, anu kabayang, oge anu dirusiahkeun dina hate hamba-hamba-Na. Hal ieu dumasar kana pidawuh Mantenna dina Al-Quran.


وَاللَّهُ يَعْلَمُ مَا فِي قُلُوبِكُمْ 


Hartosna, “Jeung Alloh uninga kana sagala perkara anu (disimpen) dina hate aranjeun,” QS al-Ahzab [33]: 51).


Ayat-ayat anu sarupi oge parantos nyebatkeun, “Anjeuna uningan (pandangan) mata anu khianat sareng naon anu disumputkeun ku hate,” (QS al-Mukmin [40]: 19);


Jeung Alloh uninga kana sagala perkara anu ku aranjeun dirahasiakeun sareng perkara anu dizohirkeun,” (QS al-Nahl [16]:19);


Kawajiban Rosul teh teu aya sanes ukur ngadugikeun, sareng Alloh uninga kana sagala anu ku aranjeun dizohirkeun sareng perkara anu ku aranjeun disumputkeun,” (QS al-Maidah [5]: 99).


Sareng masih keneh seueur ayat anu sajalan sareng kandungan ayat di luhur. Namung, intina saha wae anu tos dugi kana hakekat eta, moal wani nyimpan atanapi ngarahasiakeun perkara anu teu hade dina hatena. Sabab, sadayana bakal kauninga ku Alloh swt.


Hadirin sidang Jumah anu mulya,
Kadua, Alloh teu mandang rupa, wajah, sareng kulit hamba-Na. Anu dipandang tina dirina iwal hate. Hal ieu dumasar ka dawuhan Kangjeng Rosul:


إِنَّ اللَّهَ تَعَالَى لَا يَنْظُرُ إِلَى صُوَرِكُمْ، وَلَا إِلَى أَمْوَالِكُمْ، وَلَكِنْ يَنْظُرُ إِلَى قُلُوبِكُمْ وَأَعْمَالِكُمْ، فَمَنْ كَانَ لَهُ قَلْبٌ صَالِحٌ تَحَنَّنَ اللَّهُ عَزَّ وَجَلَّ عَلَيْهِ، وَإِنَّمَا أَنْتُمْ بَنِي آدَمَ أَكْرَمُكُمْ عِنْدَ اللَّهِ أَتْقَاكُمْ


Hartosna, “Saenya-enyana Alloh moal ningal rupa sareng harta aranjeun, tapi ningal kana hate sareng pagawean aranjeun. Sing saha-saha anu ngabogaan hate anu beresih, maka Alloh nyimpen simpati ka manehna. Aranjeun ukur anak incu Adam. Maka anu paling mulya di antara aranjeun di payuneun Allah teh nyaeta anu pang takwana,” (HR. Al-Thabrani).​​​​​​​


Katilu, hate ibarat raja, sedengkeun anggahota badan anu sejen ibarat rahayatna anu tunduk ka rajana. Lamun anu dituturkeunna hade, maka anu nuturkeun nana oge bakal hade. Lamun pemimpinna alus, maka rahayatna oge bakal alus. Ayakalana, pamimpin lempeng oge, rahayatna mah sok teu lempeng, komo deui upami pamingpinna teu lempeng. Sing emut kana dawuhan Kangjeng Rosul anu nganyatakeun:


 ألَا وَإِنَّ فِي الْجَسَدِ مُضْغَةً إِذَا صَلَحَتْ صَلَحَ الْجَسَدُ كُلُّهُ، وَإِذَا فَسَدَتْ فَسَدَ الْجَسَدُ كُلُّهُ، أَلَا وَهِيَ الْقَلْبُ​​​​​​​


Hartosna, “Sing emut yen dina jasad teh aya sagumpal daging. Lamun eta daging teh sae, maka hade sakabeh jasadna. Namung lamun eta daging ruksak, maka bakal ruksak oge sakabeh jasadna. Eta daging teh taya sanes nyaeta hate.”


Demi ngajaga satiap amalan supaya tetep hade, maka saha wae kudu ngajaga jeung memeres hatena. 


Hadirin anu mulya, 
Kaopat, hate teh gudangna sagala rupa permata berharga sareng makna-makna penting sejenna. Permata kahiji nyaeta akal, sedangkan permata paling mulia nyaeta makrifat ka Alloh, anu mangrupakeun sabab kabagjaan dunya jeung akheratna. Permata salajengnya nyaeta paningali hate atanapi nu disebat bashirah nu jadi modal keur ngadeukeutkeun diri jeung mayun ka Alloh.​​​​​​​


Saterasna permata berharga dina hate teh nyaeta niat anu tulus dina kataatan, sakaligus anu jadi faktor panangtu kahontal sareng henteuna pahala anu lana di payuneun Alloh. Kalih ti eta permata dina hate teh nyaeta rupa-rupa elmu, hikmah, wawasan, anu jadi faktor kamulyaan hamba, imma di payuneun Alloh atanapi di payuneun makhluk. Permata terakhir nyaeta perangai atanapi sifat-sifat anu terpuji. Maka demi ngajaga kaayaan permata-permata eta, hate kedah saterusna bersih sareng dijaga tina rupa-rupa kotoran sareng penyakitna.​​​​​​​


Kalima, hate ngabogaan sababaraha kaayaan. Salah sawiosna hate teh salawasna jadi sasaran serangan lawan. Utamana nyaeta serangan setan. Setan anu saterusna ngintey kelengahan hate urang. Nalika nu bogana dzikir, setan bakal ngajauhan. Ngan, nalika nu boga hatena laley, setan balik deui ngagoda. Dina waktu nu sarua, hate oge jadi tempat turunna godaan atanapi bisikan hade jeung bisikan goreng.  Bisikan hade mangrupakeun ilham lammah ti malaikat. Sedengkeun nu goreng datang ti setan.​​​​​​​


Sahingga hate moal leupas tina dua sumber bisikan tadi. Sanes ti eta, kesibukan hati jauh leuwih loba tibatan kasibukan anggahota tubuh sejenna. Rek teu kitu kumaha sabab akal jeung hawa nafsu aya di jerona. Teu  heran hate jadi tempat tarung antara dua pasukan gede, nyaeta pasukan nafsu miwah bala tentarana oge pasukan akal miwah bala tentarana.​​​​​​​


Saterasna, pangharewos atawa godaan anu datang kana hate jumlahna kacida lobana. Tah godaan eta ibarat anak panah anu diarahkeun ka manehna. Eta godaan ibarat cai hujan anu terus turun beurang jeung peuting. Salah sawios ulama ngadugikeun, dina sapoe sapeuting, hate teu kurang narima tujuh puluh ribu godaan atawa pangharewos, rek godaan anu hade atanapi godaan anu goreng. Teu aya anu bisa nolak eta godaan.


Beda kaayaannana sareng anggota badan sejenna. Panon misalna. Panon mah bisa istirahat ku cara dipeureumkeun, sedengkeun hate mah terus-terusan dihujanan ku godaan. Nyakitu deui kanggo ngatasi sareng ngendalikeunnana hate mah kacida sulitna. Sabab, kaayaan hate mah teu katempo. Naon anu terjadi di jerona terkadang teu bisa dirasakeun, dugika akibatna benar-benar katempo. Penyakit hasud atau dendam, misalnya. Teu gampang dikanyahokeun jeung dileungitkeun ku urang. Matak dibutuhkan usaha anu keras, pandangan anu seukeut, sareng timbangan anu asak, oge latihan jiwa keur ngubarannana.​​​​​​​


Nyakitu deui karuksakan anu nimpa kana hate kacida gancangna. Kaayaannana robah. Malah para ahli bahasa nguningakeun, kunaon hate disebut kalbu? Sabab manehna berasal tina kata qalbu, anu dina bahasa Arab, hartina perkara anu gampang pisan robahna. Mangga tingal kitab Minhajul ‘Abidin kagungan Imam al-Ghazali halaman 34-35.


Mudah-mudahan Alloh salawasna maparin hate anu kuat ka urang. Kantena upami pami hate urang tos kenging hidayah, mugi ulah rek dipengkolkeun kana kasesatan. Sakumahan dina doa anu sok ku urang diaoskeun:


رَبَّنا لا تُزِغْ قُلُوبَنا بَعْدَ إِذْ هَدَيْتَنا وَهَبْ لَنا مِنْ لَدُنْكَ رَحْمَةً إِنَّكَ أَنْتَ الْوَهَّابُ​​​​​​​


Hartosna,  “He Pangeran abdi sadaya, salira ulah rek ngajadikeun hate abdi sadaya condong kana kesesatan saatosna salira masihan pituduh ka abdi sadaya, sareng pasihan abdi sadaya rohmat ti sisi salira; sabab saenya-enyana salira teh anu maha masihan (karunia),” QS Ali ‘Imran [3]: 8.


اللَّهُمَّ يَا مُقَلِّبَ الْقُلُوبِ ثَبِّتْ قُلُوبَنَا عَلَى دِينِكَ​​​​​​​


Hartosna, “Ya Alloh, he Dzat anu mulak-malikkeun hate, tetepkeun hati abdi sadaya netepan dina agama salira.”


بَارَكَ اللهُ لِيْ وَلَكُمْ فِي الْقُرْآنِ الْعَظِيْمِ، وَنَفَعَنِيْ وَإِيَّاكُمْ بِمَا فِيْهِ مِنَ اْلآيَاتِ وَالذِّكْرِ الْحَكِيْمِ، وَتَقَبَلَّ اللهُ مِنِّيْ وَمِنْكُمْ تِلاَوَتَهُ، إِنَّهُ هُوَ السَّمِيْعُ الْعَلِيْمُ، أَقُوْلُ قَوْلِيْ هَذَا وَأَسْتَغْفِرُ اللهَ الْعَظِيْمَ لِيْ وَلَكُمْ وَلِسَائِرِ الْمُسْلِمِيْنَ وَالْمُسْلِمَاتِ فَاسْتَغْفِرُوْهُ إِنّهُ هُوَ الْغَفُوْرُ الرّحِيْمِ

 

Khutbah II


اَلْحَمْدُ لِلَّهِ الَّذِيْ أَمَرَنَا بِاْلاِتِّحَادِ وَاْلاِعْتِصَامِ بِحَبْلِ اللهِ الْمَتِيْنِ. أَشْهَدُ أَنْ لاَ إِلَهَ إِلاَّ اللهُ وَحْدَهُ لاَشَرِيْكَ لَهُ، إِيَّاهُ نَعْبُدُ وَإِيَّاُه نَسْتَعِيْنُ. وَأَشْهَدُ أَنَّ مُحَمَّدًا عَبْدُهُ وَرَسُوْلُهُ، اَلْمَبْعُوْثُ رَحْمَةً لِلْعَالَمِيْنَ. اَللَّهُمَّ صَلِّ عَلَى سَيِّدِنَا مُحَمَّدٍ وَعَلَى آلِهِ وَأَصْحَابِهِ أَجْمَعِيْنَ. اِتَّقُوا اللهَ مَا اسْتَطَعْتُمْ وَسَارِعُوْا إِلَى مَغْفِرَةِ رَبِّ الْعَالَمِيْنَ. إِنَّ اللهَ وَمَلاَئِكَتَهُ يُصَلُّوْنَ عَلَى النَّبِيِّ، يَاأَيُّهاَ الَّذِيْنَ ءَامَنُوْا صَلُّوْا عَلَيْهِ وَسَلِّمُوْا تَسْلِيْمًا .. وَصَلَّى الله عَلَى سَيِّدَنَا وَمَوْلَانَا مُحَمَّدٍ وَعَلَى آلِهِ وَصَحْبِهِ وَسَلَّمَ


اَللَّهُمَّ اغْفِرْ لِلْمُؤْمِنِيْنَ وَالْمُؤْمِنَاتِوَالْمُسْلِمِيْنَ وَ الْمُسْلِمَاتِ اَلاَحْيَاءِ مِنْهُمْ وَالْاَمْوَاتْ إِنَّكَ سَمِيْعٌ قَرِيْبٌ مُجِيْبُ الدَّعَوَاتِ وَيَا قَاضِيَ الْحَاجَاتِ بِرَحْمَتِكَ يَا اَرْحَمَ الرَّحِمِيْنَ


اللَّهُمَّ إِنَّا نَعُوذُ بِكَ مِنْ عَذَابِ جَهَنَّمَ وَنَعُوذُ بِكَ مِنْ عَذَابِ الْقَبْرِ وَنَعُوذُ بِكَ مِنْ فِتْنَةِ الْمَسِيحِ الدَّجَّالِ وَنَعُوذُ بِكَ مِنْ فِتْنَةِ الْمَحْيَا وَالْمَمَاتِ، اللَّهُمَّ إِنَّا نَعُوذُ بِكَ مِنْ الْهَمِّ وَالْحَزَنِ وَنَعُوذُ بِكَ مِنْ الْعَجْزِ وَالْكَسَلِ وَ نَعُوذُ بِكَ مِنْ الْجُبْنِ وَالْبُخْلِ وَنَعُوذُ بِكَ مِنْ غَلَبَةِ الدَّيْنِ وَقَهْرِ الرِّجَالِ ، اللَّهُمَّ يَا مُقَلِّبَ الْقُلُوبِ ثَبِّتْ قُلُوبَنَا عَلَى دِينِكَ، رَبَّنا لا تُزِغْ قُلُوبَنا بَعْدَ إِذْ هَدَيْتَنا وَهَبْ لَنا مِنْ لَدُنْكَ رَحْمَةً إِنَّكَ أَنْتَ الْوَهَّابُ، رَبَّنَا آتِنَا فِي الدُّنْيَا حَسَنَةً وَفِي الآخِرَةِ حَسَنَةً وَقِنَا عَذَابَ النَّارِ


عِبَادَ اللهِ، إِنَّ اللهَ يَأْمُرُكُمْ بِالْعَدْلِ وَاْلإِحْسَانِ وَإِيتَآئِ ذِي الْقُرْبَى وَيَنْهَى عَنِ الْفَحْشَآءِ وَالْمُنكَرِ وَالْبَغْيِ يَعِظُكُمْ لَعَلَّكُمْ تَذَكَّرُوْنَ. فَاذْكُرُوا اللهَ الْعَظِيْمَ يَذْكُرْكُمْ وَادْعُوْهُ يَسْتَجِبْ لَكُمْ وَلَذِكْرُ اللهِ أَكْبَرُ


Ustadz M Tatam Wijaya, Penyuluh dan Petugas KUA Sukanagara-Cianjur, Jawa Barat.


Khutbah Terbaru