Cianjur, NU Online Jabar
Dina Program Tentara Manunggal Membangun Desa (TMMD) ka-122, Kodim/0608 Cianjur ngabebenah Masjid Al Barokah, di Kampung Citapen, Desa Ciandam, Kacamatan Mande, Kabupaten Cianjur.

Danget ayeuna, eta program teh kawilang geus tereh rengse.

Komandan Satgas TMMD ka-122 Letkol Kav Yerry Bagus Merdiyanto, ngeceskeun, kalawan ngaubkeun sakumna personel Satgas, kagiatan ngabebenah eta masjid teh lumangsung lancar.

"Katambah ku ayana partisipasi ti sakumna warga, kuring yakin program renovasi ieu masjid bakal rengse luyu jeung jadwal nu ditetepkeun," pokna, waktu ngaroris ka lokasi, Salasa (22/10/2024).

Salila ngalaksanakeun kagiatan program, tetela sakumna pihak nembongkeun sumanget rukun gawe paheuyeuk-heuyeuk. Salian personil Satgas TMMD ka-122, aparat desa sarta masarakat Desa Ciandam ge aub gotong-royong malar ngabebenah Masjid Al Barokah teh bisa  geura anggeus.

"Ngahaturkeun nuhun ka sakabeh personil Satgas TMMD 122, oge ka aparat jeung warga desa nu teu weleh ngarojong kana kalancaran ieu program TMMD," ceuk Letkol Kav Yerry Bagus Merdiyanto.

Laju manehna miharep, sangkan tina kalancaran program ngabebenah masjid tug tepi ka rengsena, masing bisa mawa mangpaat keur balarea.

"Moga wae program ngabebenah Masjid Al Barokah Citapen teh sing aya dina kalancaran, bisa geura-geura dimangpaatkeun ku sakumna warga," pokna.

Kontributor: Rameli Agam