Nitenan hilal (posisi Bulan anyar) pikeun netepkeun tanggal 1 bulan Hijriyah teh bisa dilakukeun ku dua cara, nyaeta ku cara rukyat jeung hisab.

Rukyat minangka kagiatan nitenan visibilitas (kacerahan) hilal, boh ku cara langsung nitenan-ningali, atawa make alat bantu saperti teleskop.

Rukyat dilakukeun sanggeusna Panonpoe surup. Sedengkeun hisab mah cara ngitung posisi Bulan anyar kalawan make itungan matematis tur astronomis.

Pikeun nangtukeun atawa netepkeun tanggal 1 bulan Hijriyah, upamana wae tanggal 1 Ramadan, 1 Syawal, jeung 1 Dzulhijah, Kementerian Agama sok ngagelar sidang isbat.

Sakumaha nu kaunggel dina lapan.go.id, enas-enasna mah lagu nitenan hilal ku cara rukyat teh pakait oge jeung metodeu hisab.

Dina kagiatan rukyat ge sok bari make alat bantu optis kayaning binokuler atawa teleskop.

Di sagedengeun eta, kamekaran teknologi alat keur nitenan sarta ngarekam citra ge mingkin canggih, jadi matak hasil panitenan beuki jelas.

Anapon hilal, eta teh tahap meneran Bulan sabit sabadana Bulan anyar. Nalika mangsa Bulan anyar (new moon/ijtimak), sapaparat peuting Bulan teu katembong.

Ku sabab cahaya hilal teu pati caang batan cahaya Panonpoe, katambah skala ukuranana ge kalintang ipisna, ku kituna tembongna hilal teh ukur dina waktu sabada Panonpoe surup (Maghrib).

Sedengkeun ijtimak, eta teh minangka tepungna posisi Bulan jeung Panonpoe dina hiji garis edar, nu mucunghulkeun Bulan anyar dina pananggalan Hijriyah. Bulan anyar ge sok katelah Anak Bulan, istilah sejen tina hilal.

Dina analisis itungan astronomis, kamungkinan hilal bisa dititenan nalika umurna geus 8 jam 22 menit 3 detik. Tah, nangtukeun Bulan anyar dina astronomi teh leuwih notog kana tahap ijtimak (konjungsi) pikeun nangtukeun naha proses tina tahap Bulan ahir (ijtimak) ka arah Bulan anyar teh geus kajadian atawa acan.

Di Indonesia, lian ti metodeu hisab, pikeun nangtukeun awal bulan Hijriyah ge sok make cara rukyat.

Rukyat sok digelar di sababaraha titik lokasi nu sumebar di sakuliah daerah di Indonesia. Eta hasil rukyat teh jadi salasahiji bahan tinimbangan pikeun Kementerian Agama lagu netepkeun awal bulan Hijriyah dina sidang isbat.